சார்லஸ் டவுனி லேன்டிங் - ஒரு வராலாற்று சிறப்பு மிக்க இடம்.

ஆங்கிலேயர்கள் அமெரிக்காவிற்கு எப்போது வந்தார்கள், எப்படி வந்தார்கள் என்பதற்கு பல கதைகள் உண்டு. இது எங்க ஊரு கதை. அமெரிக்காவுல எந்த ஊருக்கு போனாலும் மண் நிறத்தில்(Brown colour) ஒரு பலகை மாட்டி வைத்து இருப்பார்கள், இது வரலாற்று சிறப்பு வாய்ந்த நகரம் (Historic city) என்பதற்கான அடையாளம். எங்கள் ஊரிலும் ஒரு பலகை மாட்டி வைத்து இருக்கிறார்கள்,வரலாறு என்னவென்றால்?

1670 ஆம் ஆண்டு ஏப்ரல் மாதத்தில் பொன்னு கிடைத்தாலும், கிடைக்காத புதன் கிழமை சுமார் 148 ஆங்கிலேயர்கள் ஆண், பெண் மற்றும் குழந்தைகள் உட்பட சார்லஸ் டவுனி லேன்டிங்கில், அல்பி மாரேலல் (Albemarle pointe) என்னும் இடத்தில் வந்து இறங்கினார்கள் (இப்பொழுதும் இந்த இடத்தை காணலாம்). வந்தவர்கள் மிக விரைவிலேயே வீடு கட்டி அங்கேயே ஒரு சிறு சமூகத்தை (Colony) உருவாக்கினார்கள். தங்களுக்கு தேவையான உணவையும் அங்கேயே தயாரித்து கொண்டணர், பாதுகாப்பிற்காக தங்கள் வீடுகளைச் சுற்றிலும் மரத்தினாலான வேலியை அமைத்துக் கொண்டனர். இதுதான் வெள்ளைகாரர்கள் கரோலினாவந்த கதை, பிறகு இங்கிருந்து கரோலினாவின் மற்ற பகுதிகளுக்கு குடிபெயர்ந்தனர்.

அகழ்வாராய்ச்சியாளர்கள் இன்னமும் இங்கு ஆங்கிலேயர், சிவப்பு இனத்தினர் மற்றும் கருப்பு இன மக்களைப்பற்றியும் அவர்கள் பண்பாடு, வியாபாரம் மற்றும் கலை ஆகியவற்றை பற்றியும் ஆராய்ந்து கொண்டு இருக்கின்றார்கள்.சரி இப்ப இங்க என்ன இருக்கின்றதுன்னா? குழந்தைகள் கண்டு மகிழ ஒரு சிறு மிருகக்காட்சி சாலை உள்ளது. இங்கு கரோலினா மற்றும் அதை சுற்றியுள்ள பகுதியிலுள்ள விலங்குகள் மற்றும் பறவைகள் உள்ளது.

அழகான சிறு குளங்களும் அதில் பறக்கின்ற கொக்குகளும் மிக அழகான காட்சி (அமர்ந்து பார்க்க ஆங்காங்க இருக்கைகள் உள்ளது). நடந்து செல்லும் நடை பாதையின் இருபுறங்களில் பசுமையான மரங்கள் உள்ளன.

80 ஏக்கர் நிலப்பரப்பில், ஆயிரக்கனக்கான அசாலியஸ்(Azaleas), கெமிலியாஸ்(Chamellias) மற்றும் ஓக் (live oak) மரங்களும் உள்ளன. இங்குள்ள தகவல் தொடர்பு மையத்திலேயே ஒரு சிறு அருங்காட்சியகமும் உள்ளது.

இங்கு குழந்தைகள் கொண்டு செல்வதற்கான தள்ளு வண்டி இலவசம், ஆனால் நமக்கு $5 நுழைவுக் கட்டணம். இந்த இடத்தை பற்றி நான் மேலும் சொல்வதை விட நீங்களே மாயோனின் புகைப்படங்களின் மூலம் அறிந்து கொள்ளலாம்.
முகவரி: 1500 Old Towne Rd, Charleston.

எழுதியவர்: இன்பம், இனியாழ்.

டம் : மாயோன், ராதை.

சார்லஸ்டன் கப்பல் திருவிழா

ஒரு நாள் எங்க ஊர்ல கப்பல் திருவிழா நடந்துச்சு. அப்படின்னா என்னவா? பெரிய பெரிய பாய்மரக் கப்பல்கள் எல்லாம் வரும். நிறைய நாடுகளிலிருந்தும் வரும். ஒரு நாள் நம்ம பருவாச்சியான் போய் ஒரு நாலஞ்சு கப்பலைப் பிடிச்சுக்கிட்டு வந்தாரு.



நல்லா உத்துப் பாருங்க. ஒன்னு இந்தியாவோடது. தரங்கிணி. தரங்கம் அப்படின்னா அலை. தரங்கம்பாடின்னு ஒரு ஊர் ஞாபகம் வருதா? அலை பாடும் ஊர்.

சார்லஸ்டன் துறைமுகம் இந்த நாட்டுக்கு ரொம்பப் பழசு. அந்தக் காலத்துல அமெரிக்காவுக்கு வாற கப்பல் எல்லாம் இங்கதான் வருமாம். இந்த பைரேட்ஸ் கதையெல்லாம் இங்க சொல்லிக்குவாங்க. நிறைய இடங்கள்ள அன்னாசிப் பழம் சிலை வச்சிருப்பாங்க. ஏன்னா அது நட்புக்கு அடையாளமாம். அந்தக் காலத்தில ஆப்பிரிக்காவிலேருந்து வாறவங்க நட்பைக் காட்டுறதுக்கு அன்னாசி கொண்டு வந்தாங்களாம். ஆமாங்க, நாங்க எல்லாரும் ரொம்ப நட்பானவங்க. எங்க ஊரு நிறைய தரம் நட்பான நகரம்னு பேர் வாங்கியிருக்கு. அட, சொல்ல வந்ததை விட்டுட்டு எங்கேயோ போயிட்டேன். பருவாச்சியான் எடுத்த கப்பலைப் பாத்தீங்களா, அதுக்கப்புறம் இதெல்லாம் நம்ம ஊரு சின்னப் படகுகள். மெரினாவுல நிக்கும்.

இதான் சிடி மெரினாவுல சூரியன் மறையுறது. எங்க ஊருல சூரியன் நல்லாதான் இருக்கு!

படங்கள்: பருவாச்சியான்

எழுதியவர்: பனையேறி

சைப்ரஸ் பூந்தோட்டம்

ஒரு அழகான தோட்டம், இல்லை இல்லை, மிகவும் அழகான தோட்டம் நம்ம சார்லஸ்டன்க்கு மிக அருகிலேயே உள்ளது. என்ன நுழைவு கட்டணம் $10 செலுத்த வேண்டும். பிறகு உள்ளே படகு சவாரி செய்யலாம், மீன் காட்சியகம், வண்ணத்துப் பூச்சி கூடம், முதலை, ஆமை வீடு மற்றும் அழகிய பூந்தோட்டம் என எல்லாம் பார்க்கலாம். இந்த இடம் முன்பு சைப்ரஸ் மரங்கள் அடர்ந்த நெல் பயிரிடும் தோட்டமாக இருந்தது. பிறகு தான் அழகிய சைப்ரஸ் பூந்தோட்டமாக மாற்றப்பட்டுள்ளது.

வண்ணத்துப் பூச்சி கூடம்: இங்கு சார்லஸ்டன் மற்றும் அதனை சுற்றியுள்ள பல விதமான வண்ணமயமான வண்ணத்துப்பூச்சிகள் வளர்க்கப்படுகிறது. ஒவ்வொரு காலத்திற்கு ஏற்றவகையில் இங்கு பல்வேறு விதமான வண்ணத்துப் பூச்சிகளை நீங்கள் பார்த்து ரசிக்கலாம். வண்ணம் என்றால் வண்ணம் அப்படி ஒரு அழகுவண்ண வண்ணத்துப்பூச்சிகளின் கூட்டம், குழந்தைகள் அனைவரும் மகிழ்ச்சியில் சிறகடித்து பறக்க ஆரம்பித்துவிட்டனர். நம்ம மாயோன் அண்ணன் மட்டும் சுமார் 500 படங்கள் எடுத்துத்தள்ளியிருக்கின்றார் என்றால் பாருங்களேன். (அவர் வீட்டுச்சுவற்றில் பல வண்ணத்துப்பூச்சி படங்கள் அலங்கரித்துக் கொண்டிருக்கிறது, உங்களுக்கும் வேண்டும் என்றால் மாயோனை தொடர்புகொள்க). நம்ம பனையேறி அண்ணன் மட்டும் வத்திருந்தால் பல கவிதைகளை எழுதித்தள்ளியிருப்பார். இங்கு வண்ணத்துப்பூச்சிகள் இயற்கையான சூழலில் வளர்க்கப்படுகின்றது. வண்ணத்துப்பூச்சிகளின் வாழ்கை சுழற்ச்சி பற்றிய விளக்கப்படமும் உள்ளது. மேலும் உள்ளேயே தேனீ கூடு ஒன்றும் உள்ளது.

மீன் காட்சியகம்: இது 1998ம் ஆண்டு திறக்கப்பட்டது. இங்கு பல வகையான சிறிய மற்றும் பெரிய வகை மீன்களும், பறவைகளும், பாம்பு இனங்களும் உள்ளன. குழந்தைகளுக்கு மிகவும் பிடித்த பேசும் கிளி ஒன்றும் உள்ளது.

படகு சவாரி: அடர்ந்த சைப்ரஸ் மரங்களுக்கு இடையே கருப்பு நிற நீரில் நீங்களாகவும் படகு சவாரி செய்யாலாம் அல்லது அங்கு உள்ள ஒரு படகோட்டி துணையுடனும் சவாரி செய்யலாம். எவ்வளவு நேரம் வேண்டுமானாலும் ஓட்டலாம். ஆனால் எச்சரிக்கை: தண்ணீரில் கை வைத்து செல்ல வேண்டாம், முதலைகள் உள்ளது. மேலும் ஆமைகளும் பல வகை மீன்களும் உள்ளன, கரைகளில் அழகிய மலர்களை பார்த்துக்கொண்டே படகுசவாரி செய்யலாம்.

இங்கு உணவு அருந்துவதற்கு என்றே மிகவும் அருமையான இடம் உள்ளது. ஆனால் உணவு விற்பது கிடையாது. நாம் சமைத்து எடுத்து சென்ற உணவை அங்கே சாப்பிடலாம். பத்து டாலர் செலவில் பெரியவர்கள் முதல் சிறியவர்கள் வரை அனைவரும் பார்த்து ரசித்து மகிழ சிறந்த இடம்.

முகவரி: 3030 சைப்ரஸ் கார்டன் சாலை, மாங்க்ஸ் கார்னர்,தென் கரோலினா.

எழுதியவர்: இன்பம், இனியாழ்.

படம்: மாயோன், ராதை.

ஹாமில்டன் பூங்கா

நம்ம மனைவிமார்களுக்கு கார் ஓட்ட கத்து கொடுக்கணும்ணா MUSC-ஹாகூட் கார் நிருத்தும் இடமும் (hagood parking lot) பிரிட்டில் பான்க் பூங்கா (brittle bank ) க்கும் போவோம். ஆனால் இதற்கு மிக அருகிலேயே ஹாமில்டன் பூங்கா (Hamilton Park) உள்ளது. இங்கு மனைவிக்கு கார் ஓட்ட கத்து கொடுத்துக்கொண்டே மனதுக்கு ரம்மியமான இடத்தையும் பார்த்துவிட்டு வரலாம்.

குழந்தைகள் பார்த்து ரசிக்க வாத்து கூட்டமும்,குதூகலித்து மகிழ ஒரு நீருற்றும் உள்ளது. நாம் பார்த்து மகிழ மலர் கூட்டம் உள்ளது. இங்கு மிதி வண்டி ஓட்டலாம், sun bath எடுக்கலாம். நாம் நடப்பதற்காகமிக அருமையான நடை பாதை உள்ளது.

இங்கு தான் வருடா வருடம் குழந்தைகளுக்காண ஓட்ட பந்தயமும், Piccola Spoleto விழாவின் நிறைவு நாள் நிகழ்ச்சியும் நடைபெறுகிறது. மேலும் பல இன்னிசை கச்சேரிகளும் நடைபெறுகிறது.

ஹாமில்டன் பூங்காவிற்கு அருகிலேயே சிட்டாடல் கல்லூரி உள்ளது, இங்கு வெள்ளி கிழமைகளில் நடை பெறும் பரேட் மிக பிரசித்தம். என்ன மனைவிக்கு கார் ஓட்ட கத்துதர கிளம்பிவிட்டீர்களா?

எழுதியவர்: இன்பம், இனியாழ்

படம் : மாயோன், ராதை

பதிவதில் உதவி: பனையேறி

ஒரு அழகிய மரப்பாலம்

நம்ம அண்ணன் மாயோன் ஒரு நாள் திடீரென மாலை 4.30 மணிக்கு கதவைத் தட்டி எங்கேயாவது வெளியில் போகலாம் என்றார். நேரமாகிவிட்டதே என்றோம். அவர் மிக அருகிலேயே ஒரு இடம் உள்ளது, மாலை நேரம் அல்லது காலை நேரம் தான் அங்கு பார்ப்பதற்கு நன்றாக இருக்கும் என்றார். சரி என்று நாங்களும் கிளம்பினோம். மனைவிமார்கள் ஒப்பனை செய்து கொண்டு வருவதற்கு 5.30 மணியாகிவிட்டது. முதலில் பார்ப்பதற்கு மர நடைபாதை (Board walk ) போல இருந்தது. ஆனால் உண்மையிலேயே அது மிக அருமையான இடம் தான்.

இந்த இடம் 1864 ம் ஆண்டு உள்நாட்டுப் போருக்கு முன்பு மெளன்ட் பிளெசண்ட் மற்றும் சுலைவன் தீவை இணைக்கும் மரப்பாலமாக இருந்தது. அப்போது அதன் பெயர் கோவ் இன்லெட் (cove inlet). சிறு வாகனங்களின் போக்குவரத்திற்கு உபயோகித்து வந்தனர். பிறகு 1927 ஆம் ஆண்டு பிட் தெரு பாலம் என்று அறிவிக்கப்பட்டது. இப்போது இதை வாகனப் போக்குவரத்திற்கு உபயோகிப்பதில்லை. இப்ப இதை பிக்கட் பாலம் ( Picket Bridge) என்று பெயர் மாற்றம் செய்துள்ளனர்.

பாதை பச்சைப்பசேல் என்ற புல்வெளியுடன் இருபுறமும் சுமார் 30 பனை மரங்கள் உள்ளன. இங்குள்ள மரப்பலகையில் அமர்ந்து அந்த தென்றல் காற்றை சுவாசிப்பதே அலாதி இன்பம்தான். அதற்கும் மேல் அங்கு அமர்ந்து காலை சூரிய உதயத்தையும், மாலை சூரியன் மறைவதையும் காணலாம். அது ஒரு கொள்ளை அழகு.

"மாலைப்பொழுதின் மயக்கத்திலே நான் கனவு கண்டேன் தோழி..." என்று இனிமையான கானத்தை நம்மையே அறியாமல் பாடவைக்கின்ற இடம். நம்ம சார்லஸ்டனின் அழகையும் இங்கே இருந்து ரசிக்கலாம், கண்ணுக்கு விருந்தளிக்கும் ரம்மியமான காட்சிகள்.( கல்யாணத்திற்கு முன்பு பெண்ணுடன் சென்று வந்தால் மிகவும் ரசிக்கலாம்). மிதிவண்டி ஓட்டுவதற்கும், மீன் பிடிப்பதற்கு மற்றும் கயாக்(kayak) செல்வதற்கும் ஏற்ற மிகவும் அழகான, மன நிறைவான இடம்.

அமைந்திருக்கும் இடமும், பாதையும்: Pitt Street Bridge, Mt. Pleasant (near Charleston)

Take US 17 across the Cooper River Bridge from Charleston. Bear right on Business 17 (Colemann's Blvd) through Mt. Pleasant and across Shem Creek to S.C. 703. At the next light, turn right on McCants Dr. and go about 12 blocks. Then turn left on Pitt St. Pitt St. ends at a paved and blocked-off causeway (now a city park).

எழுதியவர்: இன்பம், இனியாழ்

படம் : மாயோன், ராதை

பதிவதில் உதவி: பனையேறி