சைப்ரஸ் பூந்தோட்டம்

ஒரு அழகான தோட்டம், இல்லை இல்லை, மிகவும் அழகான தோட்டம் நம்ம சார்லஸ்டன்க்கு மிக அருகிலேயே உள்ளது. என்ன நுழைவு கட்டணம் $10 செலுத்த வேண்டும். பிறகு உள்ளே படகு சவாரி செய்யலாம், மீன் காட்சியகம், வண்ணத்துப் பூச்சி கூடம், முதலை, ஆமை வீடு மற்றும் அழகிய பூந்தோட்டம் என எல்லாம் பார்க்கலாம். இந்த இடம் முன்பு சைப்ரஸ் மரங்கள் அடர்ந்த நெல் பயிரிடும் தோட்டமாக இருந்தது. பிறகு தான் அழகிய சைப்ரஸ் பூந்தோட்டமாக மாற்றப்பட்டுள்ளது.

வண்ணத்துப் பூச்சி கூடம்: இங்கு சார்லஸ்டன் மற்றும் அதனை சுற்றியுள்ள பல விதமான வண்ணமயமான வண்ணத்துப்பூச்சிகள் வளர்க்கப்படுகிறது. ஒவ்வொரு காலத்திற்கு ஏற்றவகையில் இங்கு பல்வேறு விதமான வண்ணத்துப் பூச்சிகளை நீங்கள் பார்த்து ரசிக்கலாம். வண்ணம் என்றால் வண்ணம் அப்படி ஒரு அழகுவண்ண வண்ணத்துப்பூச்சிகளின் கூட்டம், குழந்தைகள் அனைவரும் மகிழ்ச்சியில் சிறகடித்து பறக்க ஆரம்பித்துவிட்டனர். நம்ம மாயோன் அண்ணன் மட்டும் சுமார் 500 படங்கள் எடுத்துத்தள்ளியிருக்கின்றார் என்றால் பாருங்களேன். (அவர் வீட்டுச்சுவற்றில் பல வண்ணத்துப்பூச்சி படங்கள் அலங்கரித்துக் கொண்டிருக்கிறது, உங்களுக்கும் வேண்டும் என்றால் மாயோனை தொடர்புகொள்க). நம்ம பனையேறி அண்ணன் மட்டும் வத்திருந்தால் பல கவிதைகளை எழுதித்தள்ளியிருப்பார். இங்கு வண்ணத்துப்பூச்சிகள் இயற்கையான சூழலில் வளர்க்கப்படுகின்றது. வண்ணத்துப்பூச்சிகளின் வாழ்கை சுழற்ச்சி பற்றிய விளக்கப்படமும் உள்ளது. மேலும் உள்ளேயே தேனீ கூடு ஒன்றும் உள்ளது.

மீன் காட்சியகம்: இது 1998ம் ஆண்டு திறக்கப்பட்டது. இங்கு பல வகையான சிறிய மற்றும் பெரிய வகை மீன்களும், பறவைகளும், பாம்பு இனங்களும் உள்ளன. குழந்தைகளுக்கு மிகவும் பிடித்த பேசும் கிளி ஒன்றும் உள்ளது.

படகு சவாரி: அடர்ந்த சைப்ரஸ் மரங்களுக்கு இடையே கருப்பு நிற நீரில் நீங்களாகவும் படகு சவாரி செய்யாலாம் அல்லது அங்கு உள்ள ஒரு படகோட்டி துணையுடனும் சவாரி செய்யலாம். எவ்வளவு நேரம் வேண்டுமானாலும் ஓட்டலாம். ஆனால் எச்சரிக்கை: தண்ணீரில் கை வைத்து செல்ல வேண்டாம், முதலைகள் உள்ளது. மேலும் ஆமைகளும் பல வகை மீன்களும் உள்ளன, கரைகளில் அழகிய மலர்களை பார்த்துக்கொண்டே படகுசவாரி செய்யலாம்.

இங்கு உணவு அருந்துவதற்கு என்றே மிகவும் அருமையான இடம் உள்ளது. ஆனால் உணவு விற்பது கிடையாது. நாம் சமைத்து எடுத்து சென்ற உணவை அங்கே சாப்பிடலாம். பத்து டாலர் செலவில் பெரியவர்கள் முதல் சிறியவர்கள் வரை அனைவரும் பார்த்து ரசித்து மகிழ சிறந்த இடம்.

முகவரி: 3030 சைப்ரஸ் கார்டன் சாலை, மாங்க்ஸ் கார்னர்,தென் கரோலினா.

எழுதியவர்: இன்பம், இனியாழ்.

படம்: மாயோன், ராதை.

ஹாமில்டன் பூங்கா

நம்ம மனைவிமார்களுக்கு கார் ஓட்ட கத்து கொடுக்கணும்ணா MUSC-ஹாகூட் கார் நிருத்தும் இடமும் (hagood parking lot) பிரிட்டில் பான்க் பூங்கா (brittle bank ) க்கும் போவோம். ஆனால் இதற்கு மிக அருகிலேயே ஹாமில்டன் பூங்கா (Hamilton Park) உள்ளது. இங்கு மனைவிக்கு கார் ஓட்ட கத்து கொடுத்துக்கொண்டே மனதுக்கு ரம்மியமான இடத்தையும் பார்த்துவிட்டு வரலாம்.

குழந்தைகள் பார்த்து ரசிக்க வாத்து கூட்டமும்,குதூகலித்து மகிழ ஒரு நீருற்றும் உள்ளது. நாம் பார்த்து மகிழ மலர் கூட்டம் உள்ளது. இங்கு மிதி வண்டி ஓட்டலாம், sun bath எடுக்கலாம். நாம் நடப்பதற்காகமிக அருமையான நடை பாதை உள்ளது.

இங்கு தான் வருடா வருடம் குழந்தைகளுக்காண ஓட்ட பந்தயமும், Piccola Spoleto விழாவின் நிறைவு நாள் நிகழ்ச்சியும் நடைபெறுகிறது. மேலும் பல இன்னிசை கச்சேரிகளும் நடைபெறுகிறது.

ஹாமில்டன் பூங்காவிற்கு அருகிலேயே சிட்டாடல் கல்லூரி உள்ளது, இங்கு வெள்ளி கிழமைகளில் நடை பெறும் பரேட் மிக பிரசித்தம். என்ன மனைவிக்கு கார் ஓட்ட கத்துதர கிளம்பிவிட்டீர்களா?

எழுதியவர்: இன்பம், இனியாழ்

படம் : மாயோன், ராதை

பதிவதில் உதவி: பனையேறி

ஒரு அழகிய மரப்பாலம்

நம்ம அண்ணன் மாயோன் ஒரு நாள் திடீரென மாலை 4.30 மணிக்கு கதவைத் தட்டி எங்கேயாவது வெளியில் போகலாம் என்றார். நேரமாகிவிட்டதே என்றோம். அவர் மிக அருகிலேயே ஒரு இடம் உள்ளது, மாலை நேரம் அல்லது காலை நேரம் தான் அங்கு பார்ப்பதற்கு நன்றாக இருக்கும் என்றார். சரி என்று நாங்களும் கிளம்பினோம். மனைவிமார்கள் ஒப்பனை செய்து கொண்டு வருவதற்கு 5.30 மணியாகிவிட்டது. முதலில் பார்ப்பதற்கு மர நடைபாதை (Board walk ) போல இருந்தது. ஆனால் உண்மையிலேயே அது மிக அருமையான இடம் தான்.

இந்த இடம் 1864 ம் ஆண்டு உள்நாட்டுப் போருக்கு முன்பு மெளன்ட் பிளெசண்ட் மற்றும் சுலைவன் தீவை இணைக்கும் மரப்பாலமாக இருந்தது. அப்போது அதன் பெயர் கோவ் இன்லெட் (cove inlet). சிறு வாகனங்களின் போக்குவரத்திற்கு உபயோகித்து வந்தனர். பிறகு 1927 ஆம் ஆண்டு பிட் தெரு பாலம் என்று அறிவிக்கப்பட்டது. இப்போது இதை வாகனப் போக்குவரத்திற்கு உபயோகிப்பதில்லை. இப்ப இதை பிக்கட் பாலம் ( Picket Bridge) என்று பெயர் மாற்றம் செய்துள்ளனர்.

பாதை பச்சைப்பசேல் என்ற புல்வெளியுடன் இருபுறமும் சுமார் 30 பனை மரங்கள் உள்ளன. இங்குள்ள மரப்பலகையில் அமர்ந்து அந்த தென்றல் காற்றை சுவாசிப்பதே அலாதி இன்பம்தான். அதற்கும் மேல் அங்கு அமர்ந்து காலை சூரிய உதயத்தையும், மாலை சூரியன் மறைவதையும் காணலாம். அது ஒரு கொள்ளை அழகு.

"மாலைப்பொழுதின் மயக்கத்திலே நான் கனவு கண்டேன் தோழி..." என்று இனிமையான கானத்தை நம்மையே அறியாமல் பாடவைக்கின்ற இடம். நம்ம சார்லஸ்டனின் அழகையும் இங்கே இருந்து ரசிக்கலாம், கண்ணுக்கு விருந்தளிக்கும் ரம்மியமான காட்சிகள்.( கல்யாணத்திற்கு முன்பு பெண்ணுடன் சென்று வந்தால் மிகவும் ரசிக்கலாம்). மிதிவண்டி ஓட்டுவதற்கும், மீன் பிடிப்பதற்கு மற்றும் கயாக்(kayak) செல்வதற்கும் ஏற்ற மிகவும் அழகான, மன நிறைவான இடம்.

அமைந்திருக்கும் இடமும், பாதையும்: Pitt Street Bridge, Mt. Pleasant (near Charleston)

Take US 17 across the Cooper River Bridge from Charleston. Bear right on Business 17 (Colemann's Blvd) through Mt. Pleasant and across Shem Creek to S.C. 703. At the next light, turn right on McCants Dr. and go about 12 blocks. Then turn left on Pitt St. Pitt St. ends at a paved and blocked-off causeway (now a city park).

எழுதியவர்: இன்பம், இனியாழ்

படம் : மாயோன், ராதை

பதிவதில் உதவி: பனையேறி

தேவதை ஓக் மரம் (Angel Oak Tree)

அட நம்ம ஊரு அடையாறு ஆலமரம் போல் இங்கேயும் ஒரு வயதான மரம் இருக்காமே? கேள்விப்பட்ட உடனே புகைப்படக்காரர் மாயோனுடன் புறப்பட்டுச் சென்றோம்.
எங்கே இருக்கின்றது?
முகவரி: 3688 தேவதை ஓக் சாலை, ஜான்ஸ் தீவு (Johns island), தென் கரோலினா 29455.


உயிருள்ள பழமையான மரங்களில் இதுவும் ஒன்று. இந்த மரம் 1500 ஆண்டுகள் பழமையானதாம். இது 65 அடி உயரமானதாகவும், 17000 சதுர அடி அளவுக்குப் பரந்து விரிந்தும் உள்ளது. மரத்தின் சுற்றளவு 25 அடி. (அடையாறு ஆலமரம் 500 ஆண்டுகள் பழமையானது 40,000 சதுர அடி பரந்துள்ளது). கொலம்பஸ் அமெரிக்காவுக்குள் வருவதற்கு 1000 ஆண்டுகளுக்கு முன்னேயே இதற்கான விதை விதைக்கப்பட்டுள்ளது.


இது பல சூறாவளி காற்றுகளையும், பல்வேறு இயற்கைச் சீற்றங்களையும் சந்தித்து இன்னமும் கம்பீரமாக நிற்கின்றது (பல கைத்தடிகளோடு). ஹுகோ சூறாவளியின் போது (hurricane Hugo) பலத்த சேதம் அடைந்தாலும், பிறகு சிரமப்பட்டு சீர்ப்படுத்தப்பட்டது.


இம் மரமானது முன்னொரு காலத்தில் ஆப்ரகாம் வெயிட் என்ற தனியாரிடம் இருந்தது, இப்போது சார்லஸ்டன் மாநகராட்சியே நிர்வாகிக்கிறது. நம்ம ஊரு அடையாறு ஆலமரம் போலவே இங்கே வந்தாலும் கூட மனதுக்கு மிகவும் இதமாக உள்ளது. கியாவா தீவு போகும் போது வழியிலே இங்கேயும் சென்று வரலாம். பார்பிக்யு (BBQ) செய்ய இடமுள்ளது. செலவே இல்லாமலே பார்த்து வரலாம் (No entrance fee!).

எழுதியவர்கள்: இன்பம், இனியாள்
படம் : மாயோன், ராதை
பதிவதில் உதவி: பனையேறி

பருவாச்சியான் படமெடுக்கும் கதையும், சில பூக்களும்

நம்ம பருவாச்சியான் பயங்கரமா படமெடுப்பாருன்னு ஒங்களுக்கு ஏற்கெனவே தெரியும். இப்ப அவரு எப்படி படமெடுப்பாருன்னு சொல்லுறேன்.பருவாச்சியான் என்ன செய்யிறாருன்னா, அந்தக் குழாய் நீண்ட பொட்டி இருக்கு பாருங்க, அதான் கேமரா, அதைத் தூக்கிக்கிட்டு தெருத்தெருவாத் திரியிறாரு. எதாச்சும் கொஞ்சம் கலர் கலரா இருந்துட்டாப் போதும். உடனே கேமரா, ஸ்டார்ட், ஃபோகஸ் அப்படின்னு அவரு மூளைக்கு செய்தி போயி நிப்பார், மண்டி போடுவார், குந்துவார், படுப்பார். இவரோட கலாப்பார்வைக்கு முன்னாடி ஒருத்தரும் போக முடியாது. ஆமா நடைபாதைக்குக் குறுக்கே படுத்துக் கிடந்தா எப்படிப் போறது, அதுவும் சரிதான்.

இப்படியாகப் போன பருவாச்சியான் இந்த வசந்த காலத்துல எடுத்த பூப்படங்கள்தான் இதெல்லாம். சும்மா சொல்லப்புடாது. பனை நிலத்தில பூவெல்லாம் நல்லாத்தான் இருக்கு. இதையெல்லாம் எப்புடி எடுத்தாருன்னு கேக்கனும்னா அவருகிட்டதான் கேக்கணும். கேட்டா, 1.6x100, 35mm, 1.2, 1/400 அப்படின்னு ஏதேதோ நம்பராத்தான் சொல்லுவாரு. நமக்கு எதுக்கு நம்பரு, படம் மட்டும் போதும்னு போற ஆத்மாக்களா நீங்க இருந்தாலும் சரியே.













எழுதியவர்: பனையேறி
படங்கள்: பருவாச்சியான் (அதான் படத்துலேயே எழுதியிருக்கே, அப்புறமென்னன்னு கேக்குறீங்களா? சும்மா ஒரு நாலு எடத்துல நம்ம பேரு இருக்கட்டுமேன்னுதான்!)

பக்கத்து ஊரில் ஒரு திருவிழா

நம்ம அண்ணன் இன்பம் இருக்காரே, அவரு ஒரு நாள் எல்லாரையும் கூப்பிட்டார்.
வாங்கப்பா, வசந்தம் வந்திடுச்சு, பூப்பறிக்க, இல்ல இல்ல பூ பார்க்கப்
போலாம்னு கூப்பிட்டாரு. எங்கேன்னு கேட்டோம். அட, அதாம்பா Flowertownல,
மலர் விழா (flower festival) ன்னாரு. அட, போயித்தான் பாப்பமேன்னு புள்ள
குட்டிகளோட எல்லாரும் கெளம்பிட்டோம்.


புதுசாப் பொட்டி வாங்கின மாபெரும்
பொகைப்படக் கலைஞன் பருவாச்சியானும், முதுபெரும் பொகைப்படக் கலைஞர்
மாயோனும் தம் பொட்டிகளுடன் கெளம்பிட்டாங்க (ஆமா அது என்னாங்க, ரெண்டு
பேரு மட்டும் ஒங்க கேமராவுக்கு முன்னாடி ஒரு மொழ நீளத்துக்குக் குழாய்
வச்சிருக்கீங்க?).


Summervilleலதான் இருக்கு அந்த எடம். ஆளாளுக்கு ஒரு
நேரம், ஒரு பாதை, கார் நிறுத்த ஒரு எடமுன்னு ஆகிப்போன அமளி. அங்கங்க
செல்பேசி அலறுது, எங்கெ இருக்கீங்க, எங்கெ திரும்ப, உங்க காரு எங்கெ, நா
இங்கெ அப்படின்னு. அன்னக்கின்னு அடிச்சுச்சு பாருங்க ஒரு வெயிலு. போனா
அப்பூடி ஒரு கூட்டம். ஒரு மைல் நீளத்துக்கு ரோட்டுக்கு ரெண்டு பக்கமும்,
சந்துகளுக்குள்ளயும் கடையணியும் மக்களணியும். அம்பூட்டு சனத்தை
அமெரிக்காவுல பாத்ததே இல்லன்னு சில பேரு சொல்லிக்கிட்டிருந்தாங்க.


ஆங்காங்கே ஓசிச் சரக்குகள், தீனிகள். விட்ருவமா? நடு ரோட்டுல நின்னு
முழக்கின வாத்தியங்கள். நிறைய கைவினைப் பொருட்கள், இராணுவ ஆள் சேர்ப்பு
நிலையம், காருக்குக் காப்பீடு, தோட்டத்துக்கு விதை, வீடு பழுது பார்க்க,
குடியரசுக் கட்சிக்கு ஆள் சேர்க்க, துணிக்கடை, பஞ்சு மிட்டாய்,
எல்லாமிருந்தன. குட்டிப் பிள்ளைகள் அதையும் இதையும்
தின்றுகொண்டேயிருந்தார்கள். திருவிழாக் கடைன்னா சும்மாவா? அப்புறம் ஒரு
பூங்காவுல உட்கார்ந்து கொண்டுவந்திருந்த கட்டுச் சோற்றைச் சாப்பிட்டோம்.
மாயோனும் இராதையும் தம் மகனோடு விளையாட இன்னொரு ஆள் வரும் மகிழ்ச்சியான
செய்தியைச் சொன்னார்கள்! கொஞ்சம் ஊர்க்கதை, உலகக் கதை. மதியம் இன்னும்
கொஞ்சம் கடை சுற்றல்.


அண்ணன் இன்பத்துக்கிட்ட கேட்டாங்க, ஆமாண்ணே, மலர்
விழான்னு சொன்னீங்க, ஒரு பூவையும் காணோமே! பூங்கா நிறைய பூ,
பாருப்பூன்னுட்டாரு அண்ணன். ஒரு வழியாகக் கிளம்பினோம். அண்ணன் இன்பம் ஒரு
மலர் விழாவுக்குக் கூட்டிக் கொண்டு போகாமல் விடுவதில்லை என்று கங்கணம்
கட்டியிருக்காரு. வாழ்க!

எழுதியவர்: பனையேறி
படங்கள்: பருவாச்சியான்

நாங்கள் போன இடம்:www.flowertownfestival.com/

எங்களைப் பற்றிக் கொஞ்சம்!

பனைநிலம் என்பது Palmetto State என்பதன் தமிழாக்கம். South Carolinaதான் Palmetto State. இங்கு நிறைய பனைமரங்கள் இருக்கும். இது நுங்கு காய்க்கும் பனை இல்லை. பாக்கின் அளவில் ஈச்சையின் நிறங்களில் இருக்கும். யாரும் சாப்பிடுவதில்லை. பறவைகள் சாப்பிடுமா என்று தெரியவில்லை. அழகுக்காக இங்கே பனை நிறைய இடங்களில் வளர்க்கப்படுகிறது. பெரிய பெரிய பனைமரங்களையும் வேரோடு பெயர்த்து வேறிடங்களில் ஊன்றுவார்கள். பிழைத்துக் கொள்ளும்!

இங்கு நிறைய கடற்கரைகளும் தீவுகளும் இருக்கின்றன. சதுப்பு நிலம், மலைகள், சமதளங்கள் என்று பலவித இயற்கையமைப்புக்களைக் கொண்டது தென்கரோலினா. கோடைக் காலத்தில் சுமார் 90களில் இருக்கும் வெப்பநிலை, குளிர்காலங்களில் 40களிலேயே சராசரியாக இருக்கும். பனி கொட்டுவது குறைவு, மாநிலத்தின் தென்பகுதிகளில் கிட்டத்தட்ட பனியே இராது. சூறாவளிகளின் அச்சுறுத்தல் ஒவ்வொரு ஆண்டும் இருக்கும். சில நேரங்களில் கடுமையாகத் தாக்கப்படுவதும் உண்டு. உதாரணமாக 1989ல் ஹ்யூகோ என்றொரு சூறாவளி பெருத்த சேதத்தையுண்டாக்கியது.

தென்கரோலினா சுற்றுலாவினால் சிறப்படைந்த மாநிலம். சார்லஸ்டன், சவானா, மெர்ட்ல் கடற்கரை போன்ற சுற்றுலாத் தலங்கள் நிறைய இருக்கின்றன. அமெரிக்காவின் உள்நாட்டுப் போரில் முக்கியத்துவம் பெற்றிருந்த போர்க்களங்கள் பல தென்கரோலினாவில் உண்டு. அடிமைக் காலத்தில் இருந்துவந்த பண்ணைகளயும் இங்கே பார்க்கலாம். வளர்ந்துவரும் தொழில்களைக் கொண்டவொரு மாநிலம். பெரும்பாலும் குடியரசுக் கட்சியைச் சேர்ந்த மக்களே இங்கு. சார்லஸ்டனில் இருக்கும் தெற்கத்திய உணவுக் கூடங்களும் , அவற்றில் இசைக்கப்படும் வாத்தியக் குழுக்களும் பெயர்பெற்றவை. மைய நகர் மிகவும் சுறுசுறுப்பான இரவின் களையைக் கொண்டது.

நாங்கள் இந்த கூட்டு வலைப்பதிவில் எங்களைச் சுற்றி நடக்கும் நிகழ்வுகளையும், அறிவியல் மற்றும் தொழில்நுட்பம் குறித்த பதிவுகளையும் எழுத இருக்கிறோம்!

எழுதியவர்: பனையேறி