கொலம்பியா (தென் கரோலைனா) மிருகக் காட்சி சாலை

கொலம்பியா (தென் கரோலைனா) நகரத்தின் நெரிசலைத் தாண்டி, அழகிய அமைதியான நதிக்கரை ஓரத்தில் ஒரு மிருகக் காட்சி சாலை. அருகிலுள்ள புகை வண்டிப் பாதையில், மிருகங்களுக்கு நம்மால் ஏன் தொல்லை என்பது போல எப்போதாவது வந்து செல்லும் ஓரிரு ரயில்கள். பள்ளிகளுக்கு விடுமுறை காலமாகையால் இலக்கணம் முறிந்த ஆங்கிலத்தில் கொஞ்சி வழிந்த மழலைக் கூட்டம். காற்றாடிகள், காகிதக் கொடிகள், பலூன்கள், பட்டங்கள் என குழந்தைகளை மகிழ்விக்க நிறைய பொருட்கள் - அந்த அழகான காட்சியகத்தின் வாயிலில்.

நுழைவுச் சீட்டைப் பெற்றுக் கொண்டு உள்ளே செல்கையில் அனைவரின் நடையையும் நாட்டியமாக்கிக் கொண்டிருந்த இனிய இசை. செங்கல் நிறத்தில் ஒற்றைக் காலில் தவம் செய்து கொண்டிருந்த பிளமிங்கோக்கள் நிறைந்த சிறு குளம், குழந்தைகளையும் ஒற்றைக் காலில் நிற்கத் தூண்டியது. மறுபுறம், வண்ண மீன்கள் நிறைந்த குளம். எதிரே குளு குளு வசதி கொண்ட பறவைகள் காட்சியறை. பென்குயின்கள் அழகு நடை போட்டு பார்வையாளர்களை அசத்தின. பலவகை வண்ணப் பறவைகள் கண்களுக்கு விருந்தாயின.

அடுத்து "சீ-லயன்" (sea lion) எனப்படும் ஒருவகை கடல் வாழ் மிருகத்திற்கு உணவு ஊட்டப்பட்ட காட்சிக்கு சென்றோம். மீன்களை முக்கிய உணவாக உண்ணும் இவை தம் தோலுக்குக் கீழே பல கிலோக்கள் எடையுள்ள கொழுப்பை சேகரித்து வைத்துக்கொண்டு உணவு கிடைக்காத நேரங்களில் இக்கொழுப்பை உடலின் பல முக்கிய தேவைகளுக்கு பயன்படுத்திக்கொள்ளும் திறன் வாய்ந்தவை. நாய்களை பழக்குவது போல அவற்றை நீரில் பல சாகசங்கள் புரிய பழக்கி உள்ளனர்.

அங்கிருந்து வெளியேறி மனிதக் குரங்குகளைக் காணச் சென்றோம். கண்ணாடிக்குள் இருந்து, இயற்கைச் சூழலில் உலவிக் கொண்டிருந்த கொரில்லாக்களை ரசித்துக்கொண்டிருக்கையில்-அவை பல குரங்கு சாகசங்கள் செய்தன. முகக்தைக் கோணலாக்கி அவை சிரித்ததைப் பார்த்தால் நாங்கள் சிறை வைக்கப்பட்டதாக நினைத்தனவோ என்னவோ? புகைப்படங்கள் எடுத்துக்கொண்டு மனது வராமல் அங்கிருந்து நகர்ந்தோம்.

நொடோகி காட்சியறையில் பல்வகை குரங்குகள், சிறு பூனை வகைகள், எலிகள் போன்ற சிறு மிருகங்கள் பார்வைக்கு வைக்கப்பட்டிருந்தன. இருட்டான குகை போன்ற இந்த காட்சியறையை கடந்து வெளியே வந்ததும்- கஜமுகர்கள் எங்களை வரவேற்றனர். ஆப்பிரிகாவிலிருந்து குடியேறி இருந்தன அந்த யானைக் கூட்டம். நடையிலேயே குழந்தைகளின் மதிப்பை சம்பாதித்து விட்ட யானைகளை கண் கொட்டாமல், ஆச்சரியத்துடன் பார்த்துக்கொண்டிருந்தான் எங்கள் 2 வயது மகன். கால் வலிக்க நின்று கொண்டிருக்கையில் மழை தூர ஆரம்பித்தது. மழை வலுக்கும் நேரத்திலும் எங்களை வேறிடத்தில் ஒதுங்க அனுமதிக்கவில்லை அவன். யானைகளிடமிருந்து மனதை திசை திருப்ப அவ்வளவு பாடுபட்டோம்.

அடுத்து உலகின் மிக உயரமான பாலூட்டிகள்- ஆம் - ஒட்டகச்சிவிங்கிகளை பார்த்துவிட்டு, வரிக்குதிரை, ஆஸ்டிரிச் ஆகியவற்றை பார்த்து படம்பிடித்துக்கொண்டு, ஊர்வன காட்சிக்கு வைக்கப்பட்டிருந்த இடத்திற்கு சென்றோம். வழியில் ஆமை, முதலை வகைகள் தென்பட்டன. இன்னொறு சுவையான விஷயம்- அமெரிக்க குழந்தைகள் ஆடு, மாடு, பன்றி, கோழி, குதிரை, முயல் ஆகிய மிருகங்களை பண்ணைகளில் மட்டுமே காண வாய்ப்பு கிடைக்கிறது. இம்மிருகங்கள் மற்றும் "லாமா" என்ற மிருகம் ஒன்றையும் அங்கே காட்சிக்கு வைத்திருந்தனர். இயந்திரங்கள் மூலம் பால் கரக்கும் முறைகள், தேனீக்கள் பராமரிப்பு, முட்டைகளிலிருந்து நவீன முறையில் குஞ்சு பொறித்தல் ஆகியவை வரைபடங்கள் மூலம் இப்பண்ணையில் சித்தரிக்கப்பட்டிருந்தன.

அடுத்து அவனது கவனத்தை ஈர்த்தன-மதிய உணவு உண்ட களைப்பில் இளைப்பாறத் தயாரான புலி, சிங்கம் மற்றும் ஹயீனா ஆகியவை. புலி, சிங்கங்களின் கம்பீர நடையை ஆச்சரியத்துடன் பார்த்தபடி, அடுத்து ஹயீனாக்களையும் குரங்குகளையும் காணச்சென்றோம். உலக மிருகங்களில் மிக வலிமையான தாடை ஹயீனாக்களுக்குத்தான். புட்டியில் எடுத்துச்சென்ற குளிர்ந்த-கொத்தமல்லி மிதக்கும்-மோர் குடித்துவிட்டு, மெரி-கோ-ரவுண்டு எனப்படும் விளையாட்டு வண்டியில் எங்கள் பிள்ளையோடு நாங்களும் பிள்ளையாக சுற்றி மகிழ்ந்தோம். இதிலும் யானை இருக்கை தான் எங்கள் பிள்ளைக்குப் பிடித்த இடம்.

கிளி மொழி பேசிக்கொஞ்சிய தத்தைகளுக்கு தேன் ஊட்ட சீட்டு ஒன்று வாங்கிக்கொண்டோம். கிளிகளுக்கு, அங்கு வழங்கப்படும் தேன் மட்டுமே ஊட்ட அனுமதிக்கப்படுகிறது. கீச், கீச், கீச் என்று எங்கு பார்த்தாலும் ஒரே சத்தம் அந்த கிளி காட்சியகத்தில். உள்ளே நுழையும்போதே தலையிலும், தோளிலும், கையிலும் வந்து உட்கார்ந்து நம்மை வரவேற்கின்றன. தேன் உண்ட திருப்தியில் கீச், கீச் என்று கத்தித் திரிந்தன.

யூக்கலிப்டஸ் இலைகளைத் தின்று, நிறைய தூங்கும் கோலாக் கரடிகளின் களையான முகங்களை படம் பிடித்துக்கொண்டு, ஆஸ்திரேலியாவில் அதிகமாகக் காணப்படும் கங்காருக்களை காணச்சென்றோம். களைப்பாகப் படுத்திருந்தன அவை.

காட்சியகத்தின் மூலிகைப் பண்ணைக்கு கால் வலிக்காமல் செல்ல இருக்கை வசதிகள் கொண்ட தொடர்வண்டி ஒன்றும் இயக்கப்படுகிறது. மூலிகைப் பண்ணைக்கு அருகில் பறவைகள் பல பார்வைக்கு வைக்கப்பட்டுள்ளன. பூந்தோட்டம் ஒன்றும் மக்களை மகிழ்விக்கின்றது.

இம்மிருகக் காட்சியகத்தின் முக்கிய அம்சங்கள்- குழந்தைகளுக்கு மிருகங்களைப் பற்றிய முப்பரிமான படங்கள் மற்றும் பல விளக்கப் படங்கள், குறிப்பிட்ட நேரங்களுக்கு திரையிடப்படுகின்றன. ஹாலோவீன், புதுவருட நாள் போன்ற சமயங்களில் சிறுவர்களுக்கான பல பொழுதுபோக்கு நிகழ்ச்சிகள் நடத்தப்படுகின்றன. பூந்தோட்டம், குழந்தைகளுக்கு விளையாட்டு வசதிகள், சிற்றுண்டி சாலை, குளிர்பான கடைகள், ஐஸ்கிரீம் கடைகள், சுத்தமான கழிவறைகள், நன்கு பராமரிக்கப்பட்ட சூழல் ஆகிய முக்கிய தேவைகள் இங்கே காணப்படுவதாலும், குழந்தைகளுக்கு அறிவுப்பூர்வமாக அமைந்திருப்பதாலும் இங்கே ஆண்டு முழுவதும் மக்கள் கூட்டம் வழிகிறது.

மாயோன் ராதை

"தமிழர் அதிகாரம்" - இராம.கி அவர்களின் உரை குறித்து.

தாயே தமிழே! தரணி போற்றும்எம் அமுதே!
நீயே நினைவே! எம்மில் நீங்கா உயிரே!
போற்றி! போற்றி!

தென் கரோலினாவின் பனைநிலத் தமிழ்ச் சங்கம் பல நிகழ்ச்சிகளைச் சிறப்பாக ஏற்பாடு செய்திருக்கிறது என்பதைக் கேட்டறிந்திருந்தாலும், இம்முறைதான் அந்நிக்ழ்ச்சிகளில் ஒன்றான "சிலப்பதிகாரத்தின் சிறப்புகள்" என்ற தலைப்பில் ஐயா இராம.கி அவர்கள் உரையாற்றியதைக் கேட்கும் வாய்ப்பு கிடைத்தது. ஐயா இராமகி அவர்கள் தெளிவாகவும், பொறுமையாகவும், அழகாகவும் முக்கியமாக எடுத்துகாட்டுக்களுடனும் நம் மூத்த சமூகத்தின் காலக் கண்ணாடி, ஐம்பெரும் காப்பியங்களின் ஒன்றன சிலப்பதிகரத்தின் வஞ்சிக் காண்டத்தை விளக்கலானார்.

அவரின் தொடக்கமே எனக்கு ஒரு ஆச்சரியத்தை கொடுத்தது, ஆமாம் எதைச் சொல்ல வேண்டுமோ அதை அவர்கள் உடனடியாகச் சொல்லவில்லை. மாறாக, கதையின் "பின் புலம் " என்று நம் நாட்டின் வடக்கிற்கும் தெற்கிற்கும் உள்ள தொடர்புகள், அதாவது தரைவழித் தொடர்புகள் என்னென்ன? எந்தெந்த அரசு இருந்தது, பழங்காலத்துப் பட்டிணங்கள் தற்போது எவ்வாறெல்லாம் மாறியிருக்கின்றன, பழைய துறைமுகங்கள், அவற்றைச் சார்ந்தாற் போல புதிய துறைமுகங்கள் என்று இராம.கி அவர்கள் நம் இந்திய தேசத்தின் வரலாறுகளை விளக்கியபோது நான் வியந்து போனேன். என்னைப் போலவே அனைவரும் வியந்திருப்பர் என்பதில் ஐயம் இல்லை.

ஒரு புகழ் பெற்ற வரலற்று ஆசிரியர் கூட இப்படி விளக்க முடியுமா என்பதில் மாற்றுக் கருத்து இருக்க முடியாது. இந்த வரலாற்றை அவர் விளக்க மிக முக்கியமான காரணம் இந்தியாவின் முதல் பேரரசான மகதத்தைப் பற்றிப் பேசத்தான். ஏன் என்றால் செங்குட்டுவன் வடக்கே சென்று பேரரசைத் தாக்கி அழித்ததெல்லாம் கட்டுக்கதை, உண்மையில்லை அவன் அங்கே செல்வதற்கே வழியில்லை என்று பரவலாக சொல்லப்படுகின்ற கருத்தை தகர்த்தெறிவதற்காகத்தான், அந்தப் பின்புல வரலாற்றை விளக்கினார். அதில் வடக்கிற்கும் தெற்கிற்கும் இருந்த தரைவழித் தொடர்பை விளக்கி இதன் மூலமாகத்தான் வடக்கே சென்று வீரவாகை சூடினான், இது தமிழனின் வீரம், கதையல்ல என்றார். மேலும் அவன் வீழ்த்தியது இந்திய தேசத்தின் முதல் பேரரசான மகதத்தைத் தான் என்பதற்கும் ஆதாரபூர்வமாக அந்த காப்பியத்தில் இருந்தே எடுத்துக் கூறினார்.

இவர் சொல்லவந்தது சிலப்பதிகாரத்தை என்றாலும், சிலப்பதிகாரத்தில் சொல்லப்படுகின்ற தமிழனின் வீரம் வெறும் வார்த்தையல்ல, உண்மை என்பதை உலகிற்கு உரக்கச் சொல்ல வேண்டும் என்பதாகவே பட்டது. ஒவ்வொரு தமிழனின் உள்ளத்திலும் ஆழப்பதியச் செய்யும் ஐயாவின் இந்த முயற்சி பாரட்டப்பட வேண்டியது. ஆகையால்தான் இந்த கட்டுரைக்கு தலைப்பு சிலப்பதிகாரம் என்றில்லாமல் தமிழனின் வீரத்தைப் பற்றி இருந்ததால் "தமிழர் அதிகாரம்" என்று சூட்டியுள்ளேன்.

மேலும் சிலப்பதிகாரத்தைப் பல்வேறு கோணங்களில் திறனாய்வு செய்து தமிழரின் வாழ்வு, வழக்கங்கள்,வழிபாடு, பண்பாடு என்று ஒளிந்து கிடக்கும் பல்வேறு கருத்துக்களை வெளிக் கொணர்ந்து அவற்றைப் பகிர்ந்து கொள்ளும் அவரின் நிலைப்பாடு, நமக்கெல்லாம் ஒரு வெகுமதி.

சிலப்பதிகாரத்தை வேறு கோணத்தில் திசை திருப்பி அழைத்து சென்ற ஐயா இராமகி அவர்களின் பணி தொடர்ந்து இந்த தமிழ் சமுதாயத்திற்குப் பயனுள்ளதாக அமைய வேண்டும் என்பதே அனைவரின் அவாவாக இருக்குமென்பதில் ஐயமில்லை.

ஐயா அவர்களுக்கு ஒரு வேண்டுகோள், சிலப்பதிகாரத்தில் முரண்பாடுகள் என்று நீங்கள் விவாதித்த சில கருத்துகளை மென்மேலும் ஆராய்ந்து திறனாய்வுக் கட்டுரைகள் பல எழுத வேண்டும்.

சிலப்பதிகாரத்தை நோக்கி எங்களை நடை பழகச் செய்த ஐயா இராம.கி அவர்களுக்கு எங்கள் தமிழ்ச் சங்கம் சார்பாக நன்றிகள் பல!


எழுதியவர்: பூதூர் சம்பந்தனார்.

நம்ம ஆட்டத்தைப் பாருங்க!!

போன மாசம் நம்ம தமிழ்ச் சங்கத்துல பொங்கல் விழா நடந்துச்சு. Youtubeல கிடைச்ச படங்களைப் பார்த்து நாங்க போட்ட ஆட்டம் இது. ஒன்னு ஒயிலாட்டம் (மாதிரி), இன்னொன்னு கோலாட்டம் (மாதிரி). இதைப் பாத்துட்டு இன்னும் நிறைய கத்துக்கிட்டு ஒழுங்கா ஆடணும்னு ஒரு வெறி வந்திருச்சு. அதோட விளைவா இந்த வேண்டுகோள்: உங்களுக்கு தேவராட்டம், கும்மி (அய்யோ சாமிகளா வலைப்பதிவு கும்மி வேண்டாம்!) இதுக்கான வீடியோ (+ஆடியோ) எங்கே கிடைக்கும்னு விபரம் தெரியுமா? தெரிஞ்சா கொஞ்சம் சொல்லுங்களேன்! நன்றி, நன்றி!

இப்ப எங்களோட ஆட்டம் (பாத்துட்டு youtubeலேருந்து கெளம்பி அப்படியே போயிடாம, இங்க வந்து எங்க கேள்விக்கு விடை சொல்லிட்டுப் போங்க:))

எழுதியவர்: பனையேறி

பனைநிலம் தமிழ்ச்சங்கப்பொங்கல் விழா2008

.

இடம் - தமிழ் மண்ணிலிருந்து கிட்டத்தட்ட பல்லாயிரகணக்கான காத தூரங்கள்.

நேரம் - அந்தி மயங்கும் மாலை நேரம்

வானிலை - அங்கிங்கெனாதபடி எங்கு காணினும் மழைத்தாண்டவம், ஊனிலிருந்து உயிரையே பிரித்தெடுக்கும் ஊழிக்காற்று வேறு...சொல்லவா வேண்டும். வெளியில் ஒரு வாகன, பாமர நடமாட்டம் கூட இல்லை. கல்கியின் வந்தியத்தேவனே இங்கு வந்திருந்தாலும் அவனையும் புரவியையும் களைத்து துவண்டிடச்செய்யும் வானிலை.

ஆனால் இந்த ஒரு இடத்தில் மட்டும் என்ன ஆயகலைகளின் அணிவகுப்பு, தமிழ்கலாச்சாரத்தின் பிரதிபலிப்பு.

வாங்க இந்த சார்லஸ்டன் மாணவர் மைய அரங்கில் என்ன நடக்கிறதென்னு பார்த்துடலாம்.

நம்ம இப்போ பார்க்கிறது கனவா...நனவா....அட நம்ம சார்லஸ்டன் தமிழ்மக்கள் பொங்கல் விழாவை இவ்வளவு சீரும் சிறப்புமா கொண்டாடிக்கிட்டு இருக்காங்களே. இத்தனை அருமையான நிகழ்ச்சிகளா.

விழா இன்னும் கொஞ்ச நேரத்தில ஆரம்பமாகப்போகுது....அப்படியே ஒரு மூலையில நம்ம உக்கார்ந்துக்கலாம், என்ன சொல்றீங்க.

விழா ஏற்பாடுகளை மக்கள் பம்பரமா சுறுசுறுப்பா ஓடியாடி செய்றாங்க. அங்க பாருங்க சுறுசுறுப்பா ஒலிபெருக்கி மற்றும் மின்னணுக்கருவிகள் அத்தனையிலயும் புகுந்து கலக்கு கலக்கிட்டு இருக்காரே அவருதான் நம்ம தண்டபாணி சார். அவருக்கு மேல புகுந்து வேல பார்க்கிறது வசந்த். அந்தபக்கம் பார்த்தா குழந்தைகளையும் பெரியமனுசங்களையும் சமாளிச்சிக்கிட்டு விழா ஏற்பாடுகளையும் கவனிச்சிக்கிட்டு இருக்காரே அவர்தான் சுந்தர். அட வழக்கம் போல வேலைகளை இழுத்து போட்டு செய்றாரே அதுதான் சந்தோஷ். பாபா சூர்யன், சிவா கோஷ்டிகள் வேறு பறந்து பறந்து வேலை செய்றத பார்த்துக்கிட்டே இருக்கலாம் போலிருக்கு. ஆகா வந்திட்டாரய்யா வந்திட்டாரு. காமிராவும் கையுமா...இல்ல இல்ல காமிராவே கையா வந்திட்டாரு காமிரா-கண்ணன்.

அந்த பக்கம் பார்த்தா, பெண்கள் குழு கோலாட்டம் ஒத்திகை விறுவிறுன்னு பார்த்துக்கிட்டு இருக்காங்க. இந்த பக்கம் பாருங்க ஒயிலாட்டம், நாடகம் ஒத்திகை பலமா போய்க்கிட்டு இருக்கு. அடடா...என்ன விறுவிறுப்பு. இன்னும் கொஞ்சம் மக்கள் உணவு ஏற்பாடுகளில் மூழ்கி இருக்காங்க. விழா நேரம் நெருங்க நெருங்க ஒரே பரபரப்பு. இங்க பார்க்கிறப்ப அத்தனை பேரும் தமிழக பாரம்பரிய உடையான வேட்டி சேலையில இருக்கிறது கண் கொள்ளாக்காட்சி.

இதோ ஆரம்பிச்சிடுச்சு. தொகுப்பாளினி வினு அவங்க வந்து தமிழத்தாய் வாழ்த்துக்களோட ஆரம்பிக்க அழைப்பு விடுக்கிறாங்க. அதுக்கு அடுத்தபடியா வினு அவங்க நிகழ்ச்சி என்னன்னு வழக்கம் போல அறிவிப்பாங்கன்னு பார்த்தா, ஆனந்தியைப்பார்த்து ஏதோ உங்ககிட்ட சந்தேகம் இருக்கிறமாதிரி தெரியுது என்னன்னு வந்து முன்னாடி சொல்லுங்கன்னு கூப்பிட்டு கேட்க, அதுக்கு ஆனந்தி, பொங்கல் மற்றும் தமிழக கலாச்சாரத் தொடர்பு பற்றி கேள்வியா கேட்க, அதுக்கு வினு அழகா பதில் சொன்ன அப்புறம் தான் தெரிஞ்சது அது திட்டமிட்டு செய்திருக்கிற தொகுப்பு நிகழ்ச்சின்னு. வழக்கம் போல நிகழ்ச்சிகளை தொகுத்து வழங்காம, பொங்கல் பத்தி சிறு சிறு தகவல்துளிகளை சுவராஷ்யமா செந்தில் எழுதி அதை வினு-ஆனந்தி தொகுப்பாளினிகள் அருமையா வழங்கிருக்காங்கன்னு தெரிந்தது. அதுவும் பொங்கலுக்கு முதல் நாள்தான் செந்தில் போய் வினு மற்றும் ஆனந்தி வடைசுடும் கோலாகலமான நிகழ்ச்சிக்கு மத்தியில் வசனம் சொல்லி அவங்க அதை தூக்கம் கெட்டு விடிய விடிய பரிட்சை மனப்பாடம் செய்தாங்கன்னு சுவையான கிசுகிசு வேற நமக்கு கிடைத்தது.



விழாவை இரத்தின சுருக்கமாகவே இப்போ சொல்றேன். சுந்தர் முன்னுரையுடன் தொடங்கி வைக்கிறார். அதற்கு அடுத்த படியாக குழந்தைகளின் வண்ணத்துப்பூச்சி என்கிற பாடல்...அதுக்கு குழந்தைகள் ஆகாஷ், அமிர்தா, மாசிலன், சிபி, கோகுல், அஸ்ரிதா, கண்கவரும் வண்ணங்களாக அணிவகுத்து பாடல்பாடி மகிழ்வித்தார்கள். அடுத்தபடியாக, குழந்தைகள் சிட்டா சிட்டாங்குருவின்ற பாட்டுக்கு அருமையாக நடித்து கலக்குனாங்க.


அதற்கு அடுத்தபடியாக ஹரி அவங்க அம்மா லட்சுமி அவர்கள் அயல்நாடுகளில் தமிழர்களின் மொழி மற்றும் கலாச்சார முக்கியத்துவம் பற்றி அழகாக பேசினார். பலகுரல் வித்தைகள் நிகழ்ச்சியில் யுவ்ராஜ் பலவித்தைகளை காட்டி பேசி மகிழ்வித்தார். பல திரைப்பட நடிகர்களின் குரல்களை நம்ம கண்.... இல்ல இல்ல காதுக்குள்ளேயே கொண்டு வந்து நிறுத்தினார். அதற்கடுத்தபடியாக மாறுவேடப்போட்டி. குழந்தைகள் பாரதியார், ஒளவியார், உழவர், தமிழ் ஆசிரியை, வீரபாண்டிய கட்டபொம்மன், திருவள்ளுவர் போன்று முறையே கோகுல், அஸ்ரிதா, மாசிலன், அமிர்தா, சிபி, ஆகாஷ் அவர்கள் அருமையாக வேடம் அணிந்து வசனங்களையே சிறப்பாக பேசி நடித்து பார்வையாளர்களின் உள்ளங்களை கொள்ளை கொண்டனர்.


அதற்கு அடுத்தபடியாக ஒரு நாடகம். செந்தில் இயக்கி அதில் இறைவனாக செந்திலும், தருமியாக யுவ்ராஜ், நக்கீரராக சந்தோஷ், மற்றும் மன்னராக குமரனும் நடித்திருந்தார்கள். அது நவீன திருவிளையாடற்புராணத்தின் அடிப்படையில் நகைச்சுவை கலந்து மஹாராணியின் முதுமை தீர்க்கும் மருந்துக்கு இறைவன் ச்டெம் செல் அறிவியல் ஆராய்ச்சி ரகசியத்தினை தருமி போன்ற மாணவரிடம் கொடுத்து ஒரு மில்லியன் டாலர்கள் பரிசினை பெற உதவுவதாகவும், அதை நக்கீரன் தடுப்பதாகவும், இறைவன் வந்து வாதிடுவதாகவும் இருந்தது. நாடகம் வித்தியாசமாக, நகைச்சுவையாக, அம்சமாக இருந்து அனைவரின் பாராட்டையும் பெற்றது.


இப்போ வர்றாங்களே அதுதான் மகளிர் கோலாட்ட குழு. அடடடா...ஒன்றா இரண்டா...20 நாள் வீட்டு வேலைகளை விட்டு, வினுவோட ஒருங்கிணைப்பில் கோலாட்ட குச்சிகளுக்கு பதிலா, சமையல் கரண்டிகளை வச்சு எல்லாரையும் பயமுறுத்தி ஒத்திகை மேல ஒத்திகை பார்த்திருக்காங்க. அந்த ஆடல் குழுவில் வினு, ஆனந்தி, வளர், சுபத்ரா, யசோதா, திருமகள், கலைவாணி, ஜானகி, உமா, வித்யா கலந்து அமர்க்களப்படுத்திட்டாங்க. அதுவும், ஆடல் நிகழ்ச்சியை நீங்க, உற்றுப்பாருங்க அவங்களோட கடின உழைப்பு ஒவ்வொரு அசைவிலயும் தெரியுதில்லையா. ஆட்டத்தை பார்த்துகிட்டே இருந்ததில இந்த ஆறு நிமிடங்கள் போனதே தெரியல்ல.


அடுத்து என்னன்னு பார்ப்போமா. ஆஹா, வந்திட்டாங்கய்யா...வந்திட்டாங்க. வேட்டியும் சட்டையுமா, வெள்ளையும், சொள்ளையுமா நம்ம ஆடவர் அணிதான். இந்த அணியிலிருந்த சுந்தர், சூர்யன், வசந்த், குமரன், யுவ்ராஜ், சந்தோஷ் மற்றும் செந்தில் அத்தனை பேரும் கலக்கிட்டாங்க. சுந்தரோட விருப்பத்தில் உருவான இந்த ஒயிலாட்டம் ரொம்ப அருமையாக, கண்ணைக்கவரும் வண்ணமா இருந்தது. பார்வையாளர்கள் மத்தியில் மிகுந்த ஆர்ப்பரிப்பு, உற்சாகம், கைத்தட்டல் ஆட்டம் முடிஞ்சும் ரெம்ப நேரமாக குறையவேயில்லை.

அதற்கடுத்தாற்போல பாம்பே விஸ்வநாத், ஸ்ரீதர், கார்த்திகா அவர்களின் பாடல்கள், பொங்கலில் சேர்க்கப்பட்ட முந்திரியாக சுவைத்தது.

பிறகு கலை நிகழ்ச்சிகள் பல வரிசையில் இருந்தும் நேரம் இல்லாததனால் அப்பிடியே உணவுக்கு அழைப்பு வந்திடுச்சு. ஆஹா உணவுப்பந்தல்ல பலவகை அறுசுவை உணவுகள். அது வித்யா, திருமகள், சுபத்ரா, வளர்மதி அவங்களோட ஏற்பாட்டில் அனைத்து மக்களும் அவங்கவங்களோட கைவரிசையைக்காட்டியிருந்தனர். உணவிற்கு பிறகு குழந்தைகளுக்கு பரிசுப்பொருள்கள் மற்றும் பனை நிலம் உறுப்பினர் அட்டைகளை கணேஷ் வழங்கினார்.

அதக்கப்புறமும் விழா அரங்கில குழந்தைகள் ஆட்டம் பாட்டம் கொண்டாட்டம்னு புகுந்து விளையாண்டுகிட்டிருந்தாங்க.

ஆக மொத்தத்தில இந்த பனை நிலம் 2008 பொங்கல் விழா ஒரு கலாட்டா கல்யாணம். அழகாக பரிமாறப்பட்ட அறுசுவை உணவு. நம்ம மக்கள் நெஞ்சில் என்றென்றும் நீங்காமல் இடம் பிடித்திருக்கும் கலைக்காவியம்.



.கந்தன். கருத்து உதவி - இனியன்
படங்கள் - மாயோன்
.......................................................................

பனையேறிக்கும் வீட்டுக்காரப் பெருச்சாளிக்கும் நடக்கும் தகராறு - பாகம் 1

நீங்க வாடகை வீட்டுல குடியிருக்கீங்களா? அப்படின்னா கண்டிப்பா இதப் படிங்க.
இந்தப் பனையேறியும் குடியும் குடித்தனமுமா இத்தனை காலமும் ஊரு ஊரா ஓடி ஓடி வாடகை வீட்டுலதான் இருந்துட்டு இப்பதான் எலி வளைன்னாலும் தனி வளைன்னு ஒரு வீடு வாங்கி ஒதுங்கியிருக்கான். ஆனாலும் பாருங்க, இந்த வாடகை வீட்டுக்காரப் பெருச்சாளி நம்மள தொரத்து தொரத்துன்னு தொரத்துது. வெவரமா சொல்லுறேன்.

போன அக்டோபர் மாசம் வாடகை வீட்டக் காலி பண்ணிட்டு, புது வீட்டுக்கு வந்தோம். ஆனா காலி பண்ணுற நேரத்துல பாருங்க, அந்த வீட்டுக்காரங்ய மேல ஏதோ ஒரு நம்பிக்கையில, சாவிய மட்டும் குடுத்துப்புட்டு, பாத்துக்கங்கய்யான்னு கெளம்பிட்டோம். நாங்க என்ன பண்ணியிருக்கனுமுன்னா, அவனுகளக் கூட்டிக்கிட்டு வீட்டுக்குப் போயி, இந்தா இதான் நீ குடுத்த வீடு, எல்லாம் சரியா இருக்கான்னு பாத்துக்க அப்படின்னு அவங்கிட்ட காட்டிட்டுப் போயிருக்கனும். இதுக்கு முன்னாடி இருந்த அத்தனை வீட்டுலயும் அப்படிச் செய்யல. அவனுகளும் செக்குரிட்டி டெபாசிட்டை முழுங்காம, அல்லது கொஞ்சமா முழுங்கிட்டு குடுத்துட்டாங்ய. ஆனா இந்தப் பயலுக இருக்காங்ய பாருங்க. செக்குரிட்டி டெபாசிட்டு 150 டாலர் திரும்பி வரவே இல்ல. அவனுககிட்டேருந்து ஒரு கடுதாசியும் வரல. நாங்களும் நெனச்சுப் பாக்குறதோட சரி. கேக்காமலே விட்டுக்கிட்டு சோம்பேறியாத் திரிஞ்சோமா. ஒரு நா வருது ஒரு கடுதாசி. எங்கேருந்து? கலெக்ஷன் ஏஜென்சிகிட்டேருந்து. அவன் சொல்லுறான், நீ உன்னோட ஊட்டுக்காரனுக்கு 945 டாலர் கட்டுடான்னு. எதுக்குடான்னு கூப்பிட்டுக் கேட்டா, உன்னோட கார்ப்பெட்டை மாத்துனோம். அதுக்குத்தான். அடப் பாவிகளா. பனையேறிக்கு அச்சு அச்சுன்னு தும்முதேன்னு சொல்லி ரெண்டு நாளக்கி ஒருக்கா அந்த வேக்யூம் க்ளீனரைப் போட்டு நா, எம் பொண்டாட்டி, புள்ளகுட்டி எல்லாரும் சர்ர்ர்புர்ர்ர்ருன்னு உறிஞ்சி உறிஞ்சி தூசி தூசியாக் குப்பையில கொட்டுனது என்ன? கார்ப்பெட்டுல சோறு போட்டு சாப்பிட முடியாட்டியும், கீழ விழுகுற ரஸ்க்கை டவுசர்ல தொடச்சுட்டு சாப்புர்ற அளவுக்கு சுத்தமா வச்சிருந்தமுய்யா. என்ன செய்வான் பனையேறி? ஒடனே எகிறிக் குதிச்சான். எங்க? ஊட்டுக்குள்ளதான் குதிக்கிறதெல்லாமுன்னு ஊட்டுக்காரம்மா சொல்லும். அதெல்லாம் கண்டுக்கிடாதீங்க. நானும் கலெக்ஷன் காரன்கிட்ட எகிறிப் பாத்தேன், கேட்டுப் பாத்தேன், கெஞ்சிப் பாத்தேன், சாபம் கூட வுட்டேன். ம்கூம், எந்த ஊரு வந்து பாருன்னுட்டானே. மசியல. சரி போனா போற, இன்னக்கே கட்டுனா 20% கழிச்சுத் தாறேன்னான். அடப் பாவிகளா, ஏண்டா பனையேறியோட காசுக்கு இப்படிப் பறக்குறீங்கன்னு நானும், சரிடா யோசிச்சுச் சொல்லுறேன்னு சொல்லிட்டு இன்று போய் நாளை பா அப்படின்னு அனுப்பிட்டேன். எனக்குத் தாங்கல. இருந்த பழைய ஒயினையெல்லாம் ஊத்திக் குடிச்சும் கோவம் அடங்கல.

சரின்னு நெட்டுல கொடஞ்சு, நம்ம சுத்துப்பட்டுப் பயக்களைக் கேட்டுப் பாத்தேன். ஒரு அம்மா சொல்லிச்சு, நீ வாதாடிக்கு ஒரு மணி நேரத்துக்கு 200 டாலர் குடுக்கணும். அதுக்குப் பேசாம அவன் கேக்குறதக் கட்டிரலாம்னுச்சு. இன்னொருத்தரு சொன்னாரு நீ Small Claims Court, Better Business Bureauக்குப் போன்னு. இந்த Small Claims Court இருக்கு பாருங்க, அதுல நீங்க யாருகிட்ட இருந்தாச்சும் காசு வாங்கணும்னாதான் புகார் குடுக்கலாம், அதுவும் $7500க்குள்ள இருக்கணும். எவனாச்சும் உங்க காசைப் புடுங்க வந்தா நீங்க அங்க போக முடியாது.

நெட்டுல போட்டிருக்கான், வெவரமா, அதாவது வீட்டுக்காரங்க உங்களோட செக்குரிட்டியை வீடு காலி பண்ணின, அல்லது நீங்க கேட்ட 30 நாளைக்குள்ள குடுத்துரனும்னு. ஆனா எங்காளு என்ன பண்ணினான்? கிட்டத்தட்ட 3 மாசம் கழிச்சு கலெக்ஷன் ஏஜென்சி மூலமா கடுதாசி அனுப்புறான். அ...இன்னொன்னும் மறந்துட்டனே, 150 டாலரா வாங்குன செக்குரிட்டியை, அந்தா பெரிய செக்கை, மறைச்சுட்டு, 100 டாலருதான்னு சொல்லுறான் அந்தப் புண்ணாக்கு. பாத்தா South Carolina Department of Consumer Affairs லயும் புகார் செய்யலாமுன்னு பாத்தேன். நம்ம நண்பர் ஒருத்தரு சொன்னாரு இன்னொருத்தரும் அங்கதான் முந்தி ஒருக்க முறையிட்டு நீதி வாங்குனாருன்னு. ஒடனே அவங்களுக்கு இந்த மாதிரி, இன்ன வெவரம், இதான் நடந்துச்சுன்னு வெலாவரியா எழுதிப்புட்டு ஒக்காந்திருக்கேன். பதில் தெரியுறப்ப பாகம்-2 ஐப் போடுறேன்.

ஆனா ஒன்னு, வாடகை வீட்டுல இருக்குறவங்க அந்தந்த மாநிலத்து விதிமுறைகளை நல்லாப் படிச்சுக்கங்க (ஹி ஹி சொல்வது யார்க்கும் எளியவாம்). அல்லது சுருக்கமா சொல்லுறேன் கேட்டுக்கங்க,

கார்ப்பெட்டுக்கோ, சுவத்துக்கோ, சன்னலுக்கோ, இன்ன பிற வஸ்துக்களுக்கோ 'சாதாரணமா' நடக்குற தேய்மானத்துக்கு (normal wear and tear) நீங்க காசு கட்ட வேண்டியது இல்லை. புள்ளைக பெயிண்டைக் கரைச்சு கார்ப்பெட்டுல ஊத்துனாக்கூட அது 'சாதாரணம்' அப்படிங்கறாங்க.

வீடு எடுக்குறப்ப நல்லா உத்து உத்துப் பாருங்க, எதாச்சும் ஓட்டை ஒடைசல் இருந்தா எழுதி ரெண்டு பேரும் கையெழுத்துப் போட்டு வச்சுக்கங்க. அட நீங்களும் ஒங்க வீட்டுக்காரம்மா/ய்யா இல்லங்க, வீட்டு முதலாளியச் சொல்லுறேன்.

அதே மாதிரி வீட்டைக் காலி பண்ணுறப்போ அந்த ஆளுகளைக் கூட்டிட்டு வந்து காட்டுங்க. அப்பயும் ஒரு கையெழுத்தை வாங்கிக்கங்க.

எந்த வீட்டுக்காரனையும் நம்பாதீங்க, பூராப் பயலும் சமயம் கெடச்சா ஏய்ச்சுப்புடுவாங்ய.

மறக்காம செக்குரிட்டியக் குடுடா புண்ணாக்குன்னு கேளுங்க (ஆனா ஏடாகூடமாப் பேசிடாதீங்க, ஆமா). 30 நாளைக்குள்ள செக்கு உருளலைன்னா கூப்பிட்டுக் கேளுங்க. பனையேறியாட்டம் சோம்பேறியா இருந்துட்டு அப்புறமா குதிக்காதீங்க.

சரியா, அப்ப வர்ட்டா!

பனை நிலத்தில் பொங்கலோ பொங்கல்!

பனையேறிக்குத் தலைக்கு மேல வேல கெடக்கு. என்னன்னு கேக்குறீங்களா? நம்ம பனை நிலத்துல பொங்கல் கொண்டாடப் போறோமுங்க. சுத்துப்பட்டு கிராமங்கள்ல இருக்க எல்லா மக்களும் வந்து கலந்துக்கிடணும். உங்களுக்காகவே கோலாட்டம், ஒயிலாட்டம், நாடகம், சிறுவர் மாறுவேடம், சொற்பொழிவு, அறுசுவை உண்டி எல்லாம் தயாராகிக்கிட்டே இருக்கு.

உறுப்பினர்களுக்குக் கட்டணம் இல்ல. விருந்தினர்களுக்கு 7 டாலர். நீங்க வர்றதா இருந்தா இங்க ஒரு மறுமொழி குடுங்க, இல்லாட்டி panainilam@gmail.com க்கு ஒரு மின்னஞ்சல் தட்டிவிடுங்க. மறக்காம, நீங்க எதாச்சும் நிகழ்ச்சி வழங்குறீங்களா (ஆட்டம், பாட்டு, கூத்து, கதை....) அப்படின்னும் சொல்லுங்க. எப்ப, எங்கென்னு சொன்னாத்தான வர்றதுன்னு கேக்குறீங்களா, அதுவும் சரிதான்,

45 Courtenay Drive, Charleston, SC 29401.
January 19th, Saturday, 5.00pm - 9.30pm

இன்னும் என்ன யோசனை, நாளாயிடுச்சு, கிளம்பி வந்து சேர்ற வழியப் பாருங்க. பனையேறிக்கு வேல நெறய கெடக்கு, வர்ட்டா!

பொங்கலோ பொங்கல்!!

'வளவு' இராம.கி அவர்கள் பனைநிலத்துக்கு வருகை

வளவு (http://valavu.blogspot.com) என்ற வலைப்பதிவில் தமிழ் இலக்கிய/சமூகக் கருத்துக்களை அளித்து வரும் நம் அன்புக்குரிய இராம.கி அவர்கள் பனைநிலத்தில் இவ்வார இறுதியைக் கழிக்கவுள்ளார். இவரது வருகையையொட்டி ஒரு கலந்துரையாடலுக்கு ஏற்பாடு செய்யப்பட்டுள்ளது. இது சிலப்பதிகாரத்தை மையப்படுத்தி அமையும்.
இடம்: சார்லஸ்டன் பொது நூலகம் (Charleston Public Library, Calhoun Street, Charleston)
நேரம்: சனிக்கிழமை, நவம்பர் 10, பிற்பகல் 2 முதல் 3.30 வரை.

விருப்பமுள்ள அனைவரும் பங்கு பெறலாம். தேநீருக்கும், சிற்றுணவுக்கும் ஏற்பாடு செய்யப்பட்டிருக்கிறது!

சார்ல்ஸ்டன் திராட்சை தோட்டம்

வாட்மலாவ் தீவில், 48 ஏக்கர் நிலப்பரப்பில் அமைக்கப்பட்டுள்ள இத்திராட்சைத் தோட்டத்தில் "மஸ்கடைன்" வகை திராட்சை விளைகிறது. இனிப்பு சுவை அதிகமான இவ்வகை பழங்கள், வெதவெதப்பான சீதோஷணம் காரணமாக வட அமெரிக்காவின் தென்கிழக்கு பகுதிகளிலேயே அதிகமாக காணப்படுகின்றன. "இர்வின்-கவுஸ் வைன்யார்டு" (Irvin-House Vineyards) சார்ல்ஸ்டனின் ஒரே ஒரு மதுபானம் தயாரிக்கும் சிறுதொழிற்சாலை ஆகும்.

ஐவகை மஸ்கடைன் திராட்சைப் பழங்கள் கொடிகளிள் கொத்துக் கொத்தாக பழுத்து தொங்குவதை ஆகஸ்ட், செப்டம்பர் மாதங்களில் காணலாம். இச்சமயங்களில் நம் விருப்பப்படி பழங்களை பார்க்கவும் ருசிக்கவும் அனுமதிக்கப்படுகிறது. அறுவடைக்குப் பிறகு பழங்கள் தொழிற்சாலைக்குக் கொண்டு செல்லப்பட்டு, பல்வேறு இரசாயன முறைகளில் நொதிக்கப்பட்டு, இறுதியில் அனைவரும் விரும்பும் வகையில் அழகான கண்ணாடி குடுவைகளில் அடைக்கப்பட்டு, கடைகளின் கண்ணாடி அலமாரிகளை அலங்கரிக்கின்றது. உயர்தர மக்கள் மட்டுமன்றி அனைத்துவகை மக்களும் மதுபானத்தை அலங்காரக் கோப்பைகளில் நிரப்பி உறிஞ்சும் காட்சி மேலை நாடுகளில் சகஜமான விஷயமாகும்.

தோட்டத்திலிருந்து வெளியேறுகையில் குளம் ஒன்றையும், பண்ணை மிருகங்கள் பலவற்றையும், "ஐரிஷ் மாஸ்" கொடிகள் படர்ந்த ஓக் மரங்களையும் அழகான புல் வெளிகளையும் காணலாம். கடைசியாக பரிசுப் பொருள் விற்கும் கடையில் சுவைப்பதற்கும் சிறிது மது அளிக்கப்படுகிறது. திராட்சை அறுவடைக் காலமான ஆகஸ்ட் மாத இறுதியில் மது தயாரிக்கும் திருவிழா ஒன்று வருடந்தோரும் நடத்தப்படுகிறது. இந்த வருடம் ஆகஸ்ட் 25-ம் தேதி நடந்த இவ்விழாவின் போது, மரத்தொட்டிகளில் கனிந்த பழங்கள் நிரப்பப்பட்டு, காலால் மிதித்து பழரசத்தை வெளிக்கொணர்ந்து சிறுவர்கள் விளையாடினர். முகத்தில் படம் வரைதல், சோளப்பொறி விற்பனை, மது விற்பனை, பார்-பி-க்யூ, மேற்கத்திய சங்கீதம், பண்ணை மிருகங்களுடன் விளையாடுதல் ஆகியவை இவ்விழாவின் மற்ற முக்கிய பொழுதுபோக்குகளாகும். மது அருந்துவோர் மட்டுமன்றி, அருந்தாதவரும் (திராட்சைகள் சாப்பிட்டு) மகிழ்ச்சியாக சுற்றி வர தோதான இடம். அறுவடை காலத்தில் அனைவரும் கண்டு களிக்க வேண்டிய ஒரு அமைதியான அழகான இடம் இந்த தோட்டம்.
மாயோன் ராதை

சார்லஸ்டன் போ.வி.த

சார்லஸ்டன் போ.வி.த

எல்லோரும் பூங்கா, அருங்காட்சி, விழா, அது இதுன்னு என்னன்னமோ எழுதுறாங்க.....ம்ம்ம்ம், நம்ம எதையாவது எழுதி வைக்கலாம்னுதான். ஹிஹி..

கொஞ்சம் வித்தியாசமான இடத்துக்கு போய் பார்ப்போமா. அப்பிடியே நம்ம வண்டியில ஏறுங்க! இப்போ நம்ம 26 ஹைவே வழியா போய்க்கிட்டிருக்கோம். அப்பிடியே போனா நார்த் சார்லஸ்டன் கொஞ்சம் கடந்தா விமான நிலையமே வந்துரும்...ஆனா இப்போ 642 ரூட் பாதையிலே டாச்செஸ்டர் பாதையிலே போய்க்கிட்டிருக்கோம்.....ரெண்டே நிமிசம்தான. இதோ வந்திட்டோம், எல்லாம் இறங்குங்க.

நம்ம ஊரு பஸ்டாண்ட் மாதிரி.....

விமானங்கள் எலிகள் மாதிரி ஊர்ந்து செல்லும் காட்சி....

என்ன எல்லாரும் அப்படி பார்க்கிறீங்க....இப்போ நீங்க பார்கிறதுதான் சார்லஸ்டன் போர் விமானப்படை தளம். அதுதான் சார்லஸ்டன் போ.வி.த. அமெரிக்காவிலே பழைய விமான தளங்களில் இதுவும் ஒண்ணு..கிழக்கு அமெரிக்காவிலே முதல் மூணு பெரிய விமான தளத்திலே இதுவும் ஒண்ணு......ஊரிலிருந்து 10 மைல் தள்ளியிருக்கு....கொஞ்ச நஞ்சமில்ல கிட்டத்தட்ட 3700 ஏக்கர் நிலம் இதுக்கு....6000 பேர் வேலை பார்க்கிற இடம் வேற....

அப்பாடி எம்மாம் பெருசு......C17 முன்னே ராணுவ வீரர் வாக்கிங் போறாரோ ?

1931 லே இதுக்கான இடம் வாங்கியிருந்தாலும்.....இரண்டாம் உலகப்போரில தான் 1941 லே சார்லஸ்டனோட புவிதள மதிப்பு தெரிஞ்சு போர்விமான தளத்தை நிர்மாணிச்சாங்க......1951 லதான் இதுக்கு சார்லஸ்டன் ஏர் பேஸ் பேர் வச்சாங்க. இன்னொரு விசயம் என்னான்னா, நம்ம இப்ப பயன்படுத்துகிற பொது விமான ஓடுபாதை ராணுவத்துக்கு சொந்தமாகத்தான் இருந்தது.... 1952 லிருந்து பொதுஜன விமானசேவைக்கும் பகிர்ந்தளிக்க சம்மதிச்சாங்க. இதோட 2007 பட்ஜெட் தெரியுமா..அதிகமில்லை ஜென்டில்மேன், 3.3 பில்லியன் டாலர்...அதாவது 3,300,000,000 டாலர்கள்.....யாரும் உணர்ச்சிவசப்பட்டு போய் உடனே வாங்கிட வேணாம்....அமெரிக்கா கொஞ்சம் பிழைச்சிட்டு போகட்டும்....

சார்லஸ்டன் தொங்குபாலத்தின் மேலே

இங்கே இயங்குகிற முதன்மையான விமானம்னு சொன்னா...C 17 தான்....இந்த ரக போர் விமானம் 585,000 பவுண்ட் எடையோட 500 மைல் வேகத்தில 6000 மைல் தூரத்துக்கு மேல ஒரே மூச்சுல பறக்கும்... இது நவீனமான அதிவிரைவு வீரர்கள் மற்றும் சரக்குகளை போர்ததளத்திறகு கொண்டு சேர்க்கும் விமானமாகவும் பயன்படுத்தலாம்.

விகிமேபியாவின் ஏரியல் வ்யூ http://wikimapia.org/#lat=32.899768&lon=-80.057373&z=15&l=0&m=s&v=2

ராணுவ வீரர்கள் ஈராக் பயணம்....நரகத்தை நோக்கி......

நீங்க இப்ப நிற்கிற இடம்....சார்லஸ்டன் விமானநிலையத்திலிருந்து....நம்ம ஊரு பாஷையில சொல்லனும்னா...நடக்கிற தூரந்தான. அப்பிடியே வடமேற்கு வழியா வந்தா C4 இயங்குதளம் இருக்கும், அதுக்கு வடக்கில நீங்க இப்ப பார்க்கிறீங்களே அதுதான் KC10 எக்ஸ்டெண்டர் பேஸ். அதுக்கும் வடக்கில நம்ம ஊரு பஸ்டாண்ட் மாதிரி வரிசையா C17 ஐ நிறுத்தி வச்சிருக்காங்க. அப்பப்ப பொழுது போகலன்னா இங்க இருக்கிற விமானிகள் பயிற்சி பண்றென்னு சொல்லிக்கிட்டு போர் விமானத்தில மின்னல் வேகத்தில ஊர சுத்திப்பாக்க போய்க்கிட்டு இருப்பாங்க..நம்ம காதுக்குதான் பிடிச்சது கேடு!

பாரு பாரு! பரேடு பாரு!!

சார்லஸ்டன் மேலே வட்டமிடும் ராணுவ வல்லூறு

போர் சென்று திரும்பும் அம்மாவை கட்டியணைத்து.....சில ஈரமான நெகிழ்ச்சியான தருணங்கள்

கொசுறு தகவல்

163 நாடுகள்ள அமெரிக்க ராணுவத்தோட 450,925ராணுவ வீரர்கள் நேரடியாகவோ மறைமுகமாகவோ வேலை பாத்துக்கிட்டிருக்காங்க. உள்நாட்டையும் சேர்த்து மொத்தம் 1.3 மில்லியன் பேர்.

நம்மூரு சார்லஸ்டன்ல அமெரிக்க அதிபர் புஷ் பேசியது....

அமெரிக்க விமானபடை பற்றிய மேலும் சில சுவராசியமான வீடியோக்கள்......

சார்லஸ்டன் போர் விமானதளம் பற்றிய வீடியோ

....கந்தன் - வள்ளி....

check my blog http://blogsenthil.blogspot.com/

http://senthil-senthil.tripod.com/


--------------------------------------------------------------
படங்கள் நன்றி http://public.charleston.amc.af.mil/
விடியோ உதவி youtube.com

இவை பாதுகாக்கப்பட்ட தளங்கள். இந்த ராணுவ தளங்கள் நுழைவிற்கு சிறப்பு அனுமதி தேவை.







.